Alcoa dexa de producir aluminiu primario

El borrador del estatutu de les electrointensives va tar llistu en marzu

Güei ye'l primer día en 70 años qu'Alcoa nun fabrica aluminiu primario na so planta d'Avilés. Esta madrugada completábase l'apagáu de les 185 cubes electrolítiques.

El paru forma parte del alcuerdu algamáu ente empresa y trabayadores a la espera d'un comprador, pol que'l Gobiernu comprometióse a que'l borrador del estatutu de les electrointensives tea llistu en marzu, como treslladó la Delegada de Gobiernu al comité d'empresa na xunta caltenida n'Uviéu.

La parada ordenada de les series d'electrólisis, qu'entamó'l pasáu 6 de febreru, conclúi agora. Nesta parte de la fábrica gastaba'l 65% de la enerxía que consume Alcoa n'Avilés.

Hasta'l 30 de xunu namás va funcionar una de les tres naves de la factoría, de la fundición, onde trabaya un terciu de la plantiya. El restu de los trabayadores van entamar en marzu cursu de formación.

L'oxetivu del apagáu de les cubes ye dexales nes meyores condiciones pa un posible rearranque si apaez un comprador.

El comité d'empresa tamién s'axuntó ayeri cola alcaldesa d'Avilés. Mariví Monteserín espera que se ponga en marcha lo enantes posible la oficina autonómica p'ayudar na busca de proyectos industriales que dexen la continuidá de les plantes.