Alcoa y sindicatos alcuerden ampliar hasta’l 15 de xineru’l períodu de consultes del ERE

Trabayadores gallegos d’Alcoa quemen neumáticos fuera de la xunta en Madrid

Sindicatos y Alcoa alcordaron ampliar el periodu de negociación del ERE hasta’l 15 de xineru. Yera una de les vindicaciones de los trabayadores, pa ganar tiempu nesti períodu de consultes con un plazu que terminaba güei.

La xunta celébrase dende les 10:00 d’esta mañana nun clima de tensión que foi aumentando según diben pasando les hores, porque hasta Madrid, a les puertes del hotel onde se celebra la xunta, fueron los trabayadores de la planta de Galicia, quemaron neumáticos y desaloxóse al personal del hotel.

Esta mañana, los trabayadores d’Alcoa n’Avilés volvieron a concentrase delantre la fábrica de Samalandrán en defensa de los puestos de trabayu y escontra’l pieslle de la empresa.

La protesta aumentó cola quema de neumáticos y llanzamientos de bengales y petardos. D’esti mou quixeron amosar el so sofitu a los compañeros que güei tán negociando en Madrid, cola Empresa y el Gobiernu Central.

Los trabayadores piden que l’Estáu aproveche tolos mecanismos a la so disposición pa evitar los despidos masivos. La meta agora dicen que tien que ser ganar tiempu suficiente p’algamar los alcuerdos que dexen caltener viva l’actividá industrial.

Los trabayadores d’Alcoa creen que fai falta ver toles posibilidaes d’actividá industrial, inversores, alcuerdos sociales y caltenimientu del trabayu con un diálogu a delles bandes de bona fe.