Ampliu despliegue de TPA tola xornada electoral

Nuevu programa especial a partir de les 20:00

La Radiotelevisión Pública d'Asturies despliega mañana tolos sos medios, pa nun perder detalle de la xornada y, a partir de les 20:00, nuevu programa especial que nun va acabar hasta cunta-yos el desenllaz de les urnes.

El primer avance informativu va ser a les 12:50, nel descansu del partíu de fútbol Real Uviéu B- Internacional Madrid Boadilla.

Con información detallada de los primeres compases de la xornada electoral, les votaciones de los candidatos por Asturies y una conexón col centru de datos de Madrid.

El primer datu relevante de participación, el de les 14:30, vamos ufiertalu na primer edición del informativu, amás d'una amplia información de la mañana de votaciones nos colexos electorales d'Asturies.

Pela tarde, a les 19:00, segundu avance del día, col datu de participación de les 18:30. A partir de les 19:55, yá a nada de cerrar los colexos, va entamar l'Especial Elecciones Xenerales, col resultáu del sondéu que GAD3 ellaboró pa TPA y otres televisiones autonómiques, previu al recuentu de votos.

El programa, conducíu por María Herrero y Diana Sánchez, va cuntar con una mesa d'alderique na que van tar presentes los periodistes Alberto Menéndez, Maribel Lugilde y Marcelino González.

Tanto TPA como RPA van cuntar con redactores nes sedes principales n'Asturies; tamién con un despliegue informativu en Madrid, con señales en directo dende los principales partíos y les declaraciones de los líderes políticos nacionales, una vez avanzáu l'escrutiniu.