Ana González califica d'ideolóxica la so decisión sobre los toros en Xixón

El Principáu comparte los planteamientos de Xixón frente a les corríes de toros

L'alcaldesa de Xixón, Ana González, califica la decisión de poner fin a los toros n'El Bibio d'ideolóxica. En declaraciones a TPA Noticies la rexidora pide tiempu enantes de falar de posibles perdes económiques pola supresión de la feria como denuncia OTEA.

“Hai decisiones que nun se tomen por factores económicos”, afirmó l'alcaldesa na Feria Internacional de Muestres d'Asturies dempués de que l'empresariu que lleva la plaza xixonesa valorara en 6 millones d'euros el dineru que los toros dexen na ciudá.

La rexidora aseguró que "nun se trata de dineru”, sinón que tien que ver cola evolución de la ciudadanía xixonesa que nun acepta ciertes coses y desenvolvió una sensibilidá “mui importante” hacia los animales.

“Creemos que yá nun tenemos que consiguir dineru coles corríes de toros”, aseguró González, qu'enmarcó la decisión nel apueste por un modelu de ciudá que “curie en tolos sentíos, respete y nun maltrate a los animales”.

La vocera del Gobiernu asturianu, Melania Álvarez, aseguró güei que l'Executivu autonómicu comparte l'allugamientu "políticu y ideolóxicu" que llevó al Conceyu de Xixón a poner fin a la feria taurina de Xixón y a nun anovar la concesión de la plaza na que'l pasáu domingu toreáronse dos toros llamaos "Feminista" y "Nixerianu".