Angelita Rodríguez tuvo al frente de la Panadería Caneiro de Degaña una década

La so pasión ye la música y el baille tradicional

Ángeles Rodríguez, conocida como Angelita Caneiro, nació en Trabáu, en Degaña, pero hasta los siete años vivió n’Astierna, a malapenes dos kilómetros, pero yá nel conceyu vecín d’Ibias, d’onde yera natural so padre.

El so siguiente destín foi Bilbao, onde emigró con parte de la so familia. Diez años tuvo ellí ensin escaecer nunca la so tierra natal a la que volvía tolos branos. Neses visites de branu conoció al que foi’l so home, Manuel Caneiro, de Degaña. Casó con 22 años y, entamó a trabayar na panadería, qu’entós llevaben los sos suegros.

Nestos años camudaron les coses. L’antiguu fornu, cuasi artesanal, dio pasu a unu más grande de lleña y fai 14 años al industrial qu’agora preside la estancia principal de la panadería.

Dende esa primer vegada con 22 años, hasta güei con 77, nun dexó de facer pan, nin de trabayar. Anque retirada yá, entá ayuda nes xeres de les que güei s’encarguen los sos fíos, repartiendo’l pan per tol conceyu y los llugares colos que llenda.

El so llabor, al frente de la Panadería Caneiro, valió-y en 2019 el premiu 'Resistencia Rural', por caltener vivu’l so negociu y llevar el pan caldía, que-y dieron nel Rincón Cunqueiru, nel so pueblu natal.

La so otra gran pasión, dende neña, ye la música y el baille tradicional de la zona, que deprendió viviendo los filandones na so casa.

Abandonó un tiempu la música, hasta que volvió va unos años, animada poles clases que daben en Degaña.

Cada añu acompaña la salida del ramu nes fiestes patronales de Degaña y anque diz con modestia que nun sabe tocar bien, tien delles collaboraciones discográfiques con Xosé Ambás o Rodrigo Cuevas, que ven n’Angelita Caneiro una de les meyores pandereteres que queden n’Asturies.