Anticorrupción recurre’l sobreseimientu de la corporación d’Ayer pol 'casu Hulla'

Cuestiona’l llabor desendolcáu pol instructor de la causa  

La Fiscalía Anticorrupción recurre’l sobreseimientu de la corporación d’Ayer pol 'casu Hulla' y cuestiona’l llabor desendolcáu pol instructor de la causa, pol que fuera presidente del TCXA Ignacio Vidau.

Un total de 50 folios usó la Fiscalía Anticorrupción pal so recursu que dirixe directamente a la Sala Civil y Penal y non al instructor de la causa. Nel so escritu, señala que l’instructor nun tuvo en cuenta fechos pasaos de tolos intervinientes, nun distinguió les sos actuaciones y responsabilidaes. Amás nun analizó los fechos y nin razonó por qué los actos del alcalde, los conceyales o la Xunta de Gobiernu nun son constitutivos de delitu.

Anticorrupción tamién acusa al instructor de silenciar la montonera de despropósitos alministrativos, que se cometieron, a xuiciu de so. Reprócha-y que s’acueya a los criterios d’oportunidá política y social nos que se sofitaron los conceyales, p’aprobar los diferentes actos. La Fiscalía insiste en que nun s’usó argumentu xurídicu pa ello.

Na so apellación, llega a dicir que nun ye conforme a derechu que l’Instructor ufierte la mesma rempuesta a cada investigáu de forma xenérica porque paez que nun ye posible ver güelgues de delitu en miembros concretos aisllaos. Quiciabes, recalca, pola presencia d’una aforada, en referencia a Mallada, que dio llugar, apunta, a que conoza la Sala a la que nos diriximos

El so escritu remata pidiendo que si se ve que nun hai güelgues de delitu na persona aforada, devuelvan les actuaciones al órganu competente, ensin archivalu pa tolos investigaos.