ArcelorMittal, ThyssenKrupp y Idonial fabriquen equipos de protección pa sanitarios

Los diseños tán coordinándose so la supervisión directa del personal del HUCA

 Dellos centros d'investigación y innovación asturianos entamaron a fabricar por aciu d'impresión 3D equipos de protección individual escontra'l COVID-19 pal so usu por parte del personal sanitario, una alianza público-privada a la que yá se sumaron el Centru Global d'I+D d'ArcelorMittal, el Thyssenkrupp Elevator Innovation Center y el centru tecnolóxicu Idonial.

El consorciu, coordináu pola Conseyería de Ciencia, Innovación y Universidá del Principáu, desarrolló unos diseños que yá se tán compartiendo con países d'América Llatina como Arxentina, Chile y República Dominicana.

Estos equipamientos entamaron la fabricación de dispositivos como viseres y gafes de protección, y tamién ta n'estudiu la fabricación de cascos p'aplicar presión positiva continua nes víes respiratories (CPAP).

Los diseños tán coordinándose so la supervisión directa del personal del Hospital Universitariu Central d'Asturies (HUCA), garantizando asina la so adecuación a los estándares sanitarios y del Serviciu de Salú del Principáu (Sespa).