Mañana celébrase'l xuiciu pola xestión de Natalio Grueso al frente del centru cultural Niemeyer. L'Audiencia Provincial vio la esistencia d'un riesgu real de fuga y por eso ta na cárcel nesti momentu.
Esta midida cautelar foi tomada pol tribunal de la Sección Tercera de l'Audiencia Provincial tres la celebración de la vista a la qu'asistieron la Fiscalía, les acusaciones particular y popular y el nuevu abogáu defensor, Fernando Burgos.
La Fiscalía pide 11 años de cárcel pa Grueso. Amás, afronta un pidimientu de 10 años d'inhabilitación y multa de 24.000 euros pola supuesta autoría nes irregularidaes detectaes en rellación a la emisión de factures falses o manipulaes nel Centru Niemeyer.
Tamién lu acusen de delitos siguíos de malversación en concursu medial con falsedá, otru societariu y un terceru d'insolvencia punible.
Nel procedimientu tán personaos como acusaciones particulares Foro Asturies, que pide 13 años de prisión, y la Fundación Niemeyer, que pide penes que sumen 15 años y seis meses.
Xunto a Grueso va xulgase al abogáu José Luis Rebollo, ex-secretariu de la Fundación Niemeyer, pa quien el fiscal pide una pena de dos años y tres meses de prisión.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | RSS | Sobre RTPA | Entidad adherida a AUTOCONTROL