Asturies rexistró 35 muertes por suicidiu frente a nueve por COVID-19 ente menores de 50 años en 2020

Los sanitarios demanden un Plan urxente de Prevención

En 2020, l’añu d’entamu de la pandemia, les muertes por suicidiu duplicaron les del COVID-19 ente los menores de 50 años, según datos del INE. A nivel nacional, 1.500 persones menores de 50 años suicidáronse frente a cuasi la metá, 776, que morrieron por coronavirus.

N’Asturies, nesta estaya d’edá, los menores de 50, nueve persones morrieron pol virus frente a 17 persones que se suicidaron.

En total, 2020 foi l’añu con más muertes por suicidiu dende que se tienen rexistros, cuasi 4.000, con una media de 11 persones caldía. Ye la primer causa de muerte non natural y supera en cuasi tres vegaes los accidentes de tráficu.

Los sanitarios demanden un Plan urxente de Prevención.

'Abrazos Verdes' trabaya por romper el silenciu y esbarrumbar tabús

Alba López perdió al home en 2019. Buscó sofitu pa pasar el duelu y vio que nun había nenguna asociación n’Asturies con esti envís, poro, creó una.

Dende 'Abrazos Verdes' trabaya por romper el silenciu y esbarrumbar tabús, como’l qu’asegura que falar del suicidiu incita a suicidase.

Reclamen un plan de prevención nel que se dieran a conocer les señales d’alerta que nos dicen qu’esi allegáu ta pidiendo ayuda.

Recuerden que’l suicidiu ye prevenible, que toos podemos tener tendencies suicides en dalgún momentu y que ye una solución definitiva pa un problema que, cuasi siempres, ye temporal. Por eso hai que falar del suicidiu como un problema de salú pública y afrontalu.