Asturies, n'avisu mariellu por agua y nieve

Un frente atlánticu percuerre la Península de noroeste a sureste

Asturies ta esti xueves n'avisu mariellu por lluvies que podríen dexar hasta 40 llitros per metru cuadráu en 12 hores nel cordal y los Picos d'Europa y por nevaes que van dexar hasta 10 centímetros en venticuatro hores na suroccidental y hasta 18 nel cordal y los Picos d'Europa.

Un total de 10 comunidaes activaron esti xueves l'avisu mariellu (riesgu) por lluvies, mala mar, raches de vientu d'hasta 80 kilómetru per hora y por nevaes que van atropar espesures ente ocho y 15 centímetros, informa l'Axencia Estatal de Meteoroloxía (Aemet) na so web.