Asturies asigna 212 millones pa fomentar l'empléu y la cohesión hasta 2027

El plan céntrase nos mozos, muyeres, paraos de llarga duración y persones con discapacidá

El Fondu Social Européu Plus (FSE+) va tener más de 212 millones d'euros hasta l'añu 2027 n'Asturies pa fomentar l'empléu y promover una mayor cohesión na comunidá, por aciu d'acciones empobinaes a contribuyir a la inclusión social y llaboral pa colectivos que sufren especiales dificultaes p'atopar trabayu o que tán en riesgu d'esclusión.

Mozos, muyeres, paraos de llarga duración y persones con discapacidá son los principales colectivos a los que va dirixíu esti plan que, según el conseyeru d'Industria, Empléu y Promoción Económica, Enrique Fernández, supón una "potente ferramienta pa consiguir una Asturies más cohesionada y pa siguir avanzando por y pa les persones".

La Xunión Europea va apurrir el 60 por cientu y el Principáu va completar el restu del fondu que va destinar 54,5 millones d'euros (27%) a iniciatives que dexen meyorar l'accesu a un puestu de trabayu de los colectivos oxetu d'acción, y a acciones de fomentu del emprendimientu.

La inclusión social va absorber cuasi 65 millones d'euros (32%) que, ente otros puntos, van destinar a actuaciones pal accesu a la vivienda y el sofitu a persones con dalguna discapacidá o persones ensin llar.