Asturies pide preseos xurídicos afayadizos pa caltener la xestión del llobu

Álvarez volvió refugar que se dea una mayor protección a esta especie

El Gobiernu d'Asturies encamentó al Ministeriu de Transición Ecolóxica y Retu Demográficu a que desenvuelva preseos xurídicos "afayadizos" pa que'l plan de xestión del llobu del Principáu se lleve alantre "en tolos sos términos", incluyíos los controles poblacionales de la especie.

Asina lo señaló esti vienres la vocera del Executivu rexonal, Melania Álvarez, dempués de que'l ministeriu desmintiera que vaya negociar "dende cero" un nuevu plan de xestión y control, como afirmaren les organizaciones agraries Asaja, COAG y UPA.

El secretariu d'Estáu de Mediu Ambiente, Hugo Morán, aseguró que'l procesu pa la entrada a valir de la orde qu'incorpora al llobu nel Llistáu d'Especies Monteses en réxime de Protección Especial (LESPRE) "sigue siendo'l mesmu".