Asturies sufrió 254 quemes en 52 conceyos nuna selmana

Llanes foi'l conceyu más afectáu pol fueu

Un total de 254 quemes quemaron miles d'hectárees na última selmana en 52 de los 78 conceyos asturianos, según los datos aportaos pol conseyeru de Presidencia, Guillermo Martínez, que dixo qu'entovía ye pronto pa concretar la estensión arrasada pol fueu.

Martínez fizo esti balance dpués de que'l Serviciu d'Emerxencies (SEPA) diere anueche por estinguíes toles quemes forestales qu'afectaben a la rexón dende'l miércoles pasáu, tres una xornada na que la lluvia y la baxada de temperatures facilitaron les xeres d'estinción de les últimes quemes.

Na rueda de prensa posterior al conseyu de Gobiernu, el so portavoz señaló que, del total de quemes, 61 quedaron en conatos -menos d'una hectárea quemada- y que cuatro, unu de los rexistraos en Grandas, dos de los d'Allande y el qu'hebo n'Ibias, consideráronse como grandes quemes, al arrasar caúna d'elles más de 500 hectáreas.

Llanes foi'l conceyu más afectáu pol fueu, con 38 quemes dempués El Valle Baxu de Peñamellera y Tinéu, con 14 caún; Candamu, con 13; Salas y Valdés, con 11 y Miranda, con 10.

Según Martínez, les más de les quemes fueron en fasteres altes de monte y afectaron sobre manera a matos y monte baxu, y en menor midida, a árboles y reforestaciones.

Nengún d'estos fueos provocó daños personales, anque dalgunos d'ellos, como los d'Omente, n'Ibias y el de Navedo, n'Eilao, obligaron a establecer dispositivos especiales pola so cercanía a dalgunes cases.

Martínez insistió en qu'entovía "ye pronto pa sacar conclusiones sobre les motivaciones o causes" qu'orixinaron estes quemes, anque amosóse convencíu de que tarán na llinia d'años pasaos.

En 2016, el 91% de les quemes forestales rexistraes nel Principáu fueron provocaes, según recordó güei'l conseyeru, que refugó pronunciase al respeutive de les declaraciones del coronel xefe de la Guardia Civil, Javier Almiñana, qu'apuntó como una de les posibles causes de toes estes quemes la modificación de la Llei de Montes asturiana.

Esti cambéu llexislativu permitió eliminar los acotamientos en vigor hasta'l mes de marzu pasáu pa impedir que'l ganáu paste nes superficies quemaes.

La modificación, impulsada pol PP y a la que namái s'opuso Podemos nel Parllamentu asturianu, foi tamién apuntada como posible causa de la proliferación de quemes por delles organizaciones ecoloxistes.

"El Gobiernu nun tien elementos pa opinar sobre esa cuestión", solliñó'l conseyeru enantes d'asegurar que desconocen si hai informes qu'avalen esa tesis.

En cualquier casu, afirmó "nun hai que sacar conclusiones precipitaes" énte una foleada de quemes que tamién se dio en provincies que llenden con Asturies.

Énte la propuesta del delegáu del Gobiernu n'Asturies, Gabino de Lorenzo, de suscribir un alcuerdu "ente tolos axentes" al rodiu de les quemes forestales pa que les quemes de matos se fagan en momentos meteorolóxicamente afayadizos y consensuaos, Martínez dixo que'l Gobiernu tien les sos polítiques de prevención y una estratexa dafechu de llucha escontra quemes pero que si hai otres propuestes espera que-y les fagan llegar.

Nos siete díes nos que tuvo activu l'INFOPA, movilizáronse 853 efectivos humanos, entre bomberos del SEPA, y personal del 112, cooperatives forestales, guardes del mediu rural y personal del Ministeriu d'Agricultura, que dispusieron de 189 vehículos terrestres y ocho aeronaves pa lluchar escontra'l fueu.

Agora, entamarán les xeres pa determinar les hectárees arrasaes pol fueu, una vez que les condiciones meteorolóxiques dexen la perimetración dende los helicópteros del Principáu.