Asturies va tener prórroga presupuestaria en 2018

Carcedo: "Un serviciu gratuitu de 0-3 que nun seya pa toos ye inxustu"

Asturies va tener en 2018 la segunda prórroga de l'actual llexislatura al salir alantre nel Parlamentu rexonal les enmiendes de totalidá de PP, Podemos, Foro y Ciudadanos -votaes conxuntamente polos cuatro grupos- pa refugar el presupuestu pautáu pol Gobiernu del PSOE con IX.

Les enmiendes recibieron el sofitu de los 26 diputaos que sumen les cuatro formaciones anque Podemos afirmara tar dispuestu a reconsiderar la so postura si'l Gobiernu apurría dos millones d'euros más pa financiar la rede d'escueles infantiles de manera que, a partir del 1 de xineru, los sos 3.600 usuarios recibieren esi serviciu de forma gratuita.

L'Executivu caltuvo'l so criteriu de que'l presupuestu contemplara namás una rebaxa del 50 por cientu nes cuotes yá qu'aplicar la gratuidá pa los actuales usuarios de la rede xeneraría desigualdá col restu de ciudadanos que nun esfruten d'esi serviciu, allugáu namás en 38 de los 78 conceyos de la rexón.

Asina, la de 2018 va ser la segunda prórroga de la llexislatura tres la de 2016, cuando'l Gobiernu retiró los sos presupuestos al constatar la so falta de sofitos, mientres qu'en 2017 l'Executivu socialista sacó adelantre les sos cuentes col sofitu de PP y Ciudadanos.

En rematando la sesión, el presidente del Principáu, Javier Fernández, alvirtió de que, al igual que nel restu de la llexislatura, a Podemos pésa-y menos el sentíu de responsabilidá "que la rensía colos socialistes", lo que los lleva a aplicar "la coalición negativa o la vetocracia" cola derecha.

Fernández llamentó que se perdiera una oportunidá pa sacar alantre les cuentes públiques, "y eso nun ye bono p'Asturies y pa los asturianos", y conseñó que Podemos opúnxose al presupuestu per tercer añu consecutivu.

"A Podemos impórten-y menos les coses que facemos que lo que somos", apuntó en señalando que'l Gobiernu va ponese de momentu a redactar el decretu de prórroga y les lleis de creitu necesaries pa "minorar" el so efectu y refugar la posibilidá plantegada pola formación morada de treslladar a la Cámara un nuevu proyectu presupuestariu nel primer trimestre de 2018.

Esta posibilidá fuera apuntada pol voceru moráu, Emilio León, pa garantizar el sofitu del so partíu una vegada que'l Gobiernu defina'l nuevu modelu d'educación infantil de 0 a 3 años p'aplicar la gratuidá que reclama Podemos.

"El problema nun ye de dineru y el problema nun ye Podemos", señaló n'apuntando la posibilidá de que, daes "les torgues" que siempres-yos plantega'l PSOE asturianu y les facilidaes que los socialistes atopen p'apautar col PP, la dificultá pal Gobiernu rexonal ye'l fechu de pautar col partíu moráu.

Al so xuiciu, el Gobiernu nun fixo "nin el más mínimu xestu" y "quixo que'l sofitu de los sos nueve diputaos saliera de baldre" yá que los sos pactos previos col PP supunxeron p'Asturies, en perda d'ingresos, cuadruplicar la cuantía que supondría afitar la gratuidá na rede de 0 a 3 años.

Esta afirmación foi rebatida pola conseyera de Facienda, Dolores Carcedo, que señaló qu'aplicar de forma inmediata esa gratuidá definiría un modelu "inxustu" yá que namás beneficiaría a los actuales usuarios y non tolos asturianos podríen beneficiase colo que se pondría en riesgu l'actual sistema.

La falta d'alcuerdu entre los grupos de la izquierda constitúi "un espectáculu llamentable", según la presidenta del PP, Mercedes Fernández, en criticando'l "xuegu d'egos" nel que PSOE, Podemos y IX convirtieron una negociación "ente engañadores profesionales".

Al so xuiciu, resulta "llamentable" qu'un presidente que pue favorecer alcuerdos como los que-y ufiertaba'l PP "esfrute aisllándose y apurriendo desalcuerdos" hasta asitiase "nuna soledá inesplicable" lo que demuestra que "a esta izquierda quéda-y bien pocu tiempu" y el PSOE asturianu, con esa deriva, lleva camín de nun tener "nin grupu parlamentariu" nes elecciones de 2019.

Pal voceru d'IX, Gaspar Llamzares, Podemos contradizse al refugar n'Asturies un presupuestu "inversor y espansivu" y sofitar les cuentes de los gobiernos socialistes d'Estremadura o Castiella-La Mancha polo qu'emplaza a la formación morada a deprender que la política "ye'l terrén de la insatisfaición".

"Nós sí somos una izquierda seria", sorrayó en defendiendo l'alcuerdu algamáu col PSOE y llamentar que se refugue un presupuestu que podría sirvir como "palanca" pa dar un xiru a la política autonómica nos 18 meses que queden de llexislatura.

Pela so parte, Foro emplazó a Javier Fernández a dimitir o a convocar elecciones tres el refugu del so presupuestu mientres que Ciudadanos repitió la so oposición a unes cuentes "continuistes pa peor" que nun sacaríen a Asturies de la cola de la crecedera.