Asturies y Galicia alcuerden "dir de la mano" pa revertir los pieslles d’Alcoa

Fernández asegura que la forma y el fondu de la decisión empresarial d’Alcoa son "inalmitibles"

Los Gobiernos autonómicos d’Asturies y Galicia decidieron "dir de la mano" y trabayar a comuña pa tratar de revertir los pieslles d’Alcoa n’Avilés y A Coruña y esixir al Executivu central qu’afite un marcu regulatoriu del preciu de la enerxía pa los años vinientes.

El presidente asturianu, Javier Fernández, y el de la Xunta de Galicia, Alberto Núñez Feijóo, tuvieron güei una xunta n’Uviéu pa tratar una rempuesta coordinada y a comuña pa la decisión de la multinacional, unu de los mayores productores d’aluminiu del mundu, de pesllar les sos plantes d’Avilés y A Coruña, que dan trabayu a 686 trabayadores.

Dempués d’una xunta de media hora, el xefe del Executivu asturianu afirmó que l’anuncia de pieslle de les dos plantes supondrá’l "impactu brutal" pa los trabayadores afectaosy pa les economíes de les dos comunidaes autónomes.

A xuiciu de so, la forma y el fondu d’esta decisión empresarial son "inalmitibles", porque una cuestión d’esti calibre "tendría que negociase dende va tiempu".

Javier Fernández pidió al Gobiernu central qu’afite un "marcu regulatoriu estable" del preciu de la enerxía pa evitar qu’haya consecuencies sobre otres grandes empreses con gran consumu eléctricu.

"Pidirémos-y qu’ayude pa que la empresa reconsidere la so posición", punxo de manifiestu’l xefe del Executivu asturianu.

Per parte de so, el presidente de la Xunta de Galicia insistió na necesidá de buscar una solución a comuña col Principáu p’abordar una situación que confía en que seya "reversible".

"Nun ye de recibu que nos enteremos polos medios de comunicación", llamentó Núñez Feijóo, que señaló que’l pieslle ye "mui difícil d’entender".