Barbón aconceyará la selmana qu'entra col Gobiernu pa garantizar les inversiones

El presidente analizará "obra a obra" la baxa execución de les inversiones estatales

El presidente del Principáu, Adrián Barbón, dio anuncia esti miércoles de que’l llunes y martes de la selmana qu’entra aconceyará con ministros y ministres del Gobiernu p’analizar "puntu a puntu" la situación de les inversiones n’Asturies y centrar los "esfuerzos nel futuru pa garantizar que les grandes cuestiones p’Asturies puean desendolcase l’añu qu’entra".

Barbón, que fizo estes declaraciones en sede parllamentaria énte la entruga del secretariu xeneral de Foro, Adrián Pumares, al rodiu de la execución presupuestaria del Gobiernu d’España n’Asturies, dixo que nos últimos díes tuvo en contactu col ministru de la Presidencia, Rellaciones coles Cortes y Memoria Democrática, Félix Bolaños, que ye’l qu’organiza l’acción del Executivu pa coordinar estes xuntes.

En concreto, Barbón analizará "obra a obra" con dellos ministros la baxa execución de les inversiones estatales previstes n’Asturies pa 2021, que se llendó al 40,51 por cientu según los datos de la Intervención Xeneral de l’Alministración del Estáu (IXAE).