Barbón acusa a Alcoa de buscar escuses de mal pagador na venta de les plantes

"La empresa nun se ta comportando y lo que fizo nestos últimos díes ye digno de toa crítica"

El candidatu del PSOE a la Presidencia del Principáu, Adrián Barbón, aseguró esti martes tar "mui enfadáu" cola actitú de l’aluminera Alcoa a la qu’acusó de buscar "escuses de mal pagador" nel procesu de venta al fondu suizu Parter de les plantes d’Avilés y A Coruña.

"La empresa nun se ta comportando y lo que fizo nestos últimos díes, y inclusive enantes, ye digno de toa crítica", apuntó Barbón en declaraciones a los periodistes al entamu de la ronda de contactos de cara a la so investidura como presidente.

Amás, aseguró tar del llau de los trabayadores y del Gobiernu a la hora de "forzar la mano" pa que la venta se faga y esixó a Alcoa "responsabilidá" pa zarrar un procesu abiertu cola anuncia del pieslle de dambes plantes y nel que tien que "cumplir lo pactao y dar una viabilidá de trabayu y de futuru".