Barbón: "La Oficina d'Economía y Comerciu en Madrid saldrá a la caza d'inversiones"

Sedrá "un focu d'alcuentru permanente cola actividá inversora, comercial y económica"

La Oficina d’Economía y Comerciu d’Asturies en Madrid, qu’arrancará la so actividá nos meses vinientes, saldrá "a la caza espresa d’inversiones" pal Principáu, aseguró esti xueves el xefe del Executivu autonómicu, Adrián Barbón.

Asina lo manifestó na robla del conveniu de collaboración cola Federación Asturiana d’Empresarios (FADE), les Cámares de Comerciu y l’Asociación Compromisu Asturies XXI pa impulsar la puesta en marcha d’esti órganu, que tendrá como asitiamientu l’antigua sede del Gobiernu asturianu na capital y cuntará con un desembolsu de 750.000 euros.

Barbón aseguró que, una vegada arranque la so actividá -previsiblemente, pa finales d’esti añu o entamos de 2025-, sedrá "un focu d’alcuentru permanente cola actividá inversora, comercial y económica" p’atrayer oportunidaes p’Asturies.