Barbón asegura que "enxamás" habrá formación billingüe obligatoria n'asturianu

El presidente del Principáu alvierte de que la reforma del Estatutu tendrá qu'inxertar otres cuestiones amás del asturianu

El presidente del Principáu, Adrián Barbón, garantizó esti miércoles que’l so partíu "enxamás" aceptará un modelu d’oficialidá del asturianu que contemple la obligatoriedá de recibir "una formación billingüe" n’asturianu nel ámbitu educativu en casu de que salga alantre la reforma estatutaria p’afitar esa midida que’l so Gobiernu negocia con tolos grupos menos con Vox.

"Naide va tar obligáu a falar n’asturianu" si la cooficialidá s’inxerta nel Estatutu d’Autonomía, apuntó’l xefe del Executivu en rellación a una reforma sobre la qu’alvirtió que tendrá qu’inxertar otres cuestiones al marxe de la situación del asturianu por mor de que, de llendase a esi aspectu, el PSOE "nun la votaría".