Barbón confía en que la venta d’Alcoa llegue "a bon puertu"

El conseyeru d’Industria cree que’l miércoles sedrá la confirmación definitiva

El presidente d’Asturies, Adrián Barbón, afirmó esti llunes tener "esperances ciertes" en que’l procesu de venta de les fábriques d’Alcoa d’Avilés y A Coruña acabe con éxitu.

El xefe del Executivu asturianu confió en que’l fondu suizu Partner Capital presente les garantíes de liquidez "en tiempu y forma" y vaya alantre la operación.

"Dende llueu, vamos volcanos nello", manifestó enantes de señalar que’l Ministeriu d’Industria tamién sigue "pasu a pasu" el procesu.

El titular d’Industria, Trabayu y Promoción Económica del Principáu, Enrique Fernández, declaró tamién que’l procesu de venta de les fábriques d’Alcoa d’Avilés y A Coruña ta faciéndose como taba afitáu, poro, quixo tresmitir un mensaxe de tranquilidá.

Esmolecíos anque ensin perder la esperanza tán los 150 trabayadores que güei siguíen cola so rutina de trabayu na fábrica d’Alcoa n’Avilés. A un día de qu’acabe’l plazu pa que’l fondu suizu Parter ingrese los cerca de 27 millones d’euros como aval pa la compra de les factoríes d’Avilés y A Coruña.

El miércoles viniente los trabayadores tán llamaos a dos xuntes col Ministeriu d’Industria y Alcoa pa conocer el futuru de les factoríes.