Barbón nagua por blindar los derechos de la muyer pa responder a la involución

Llaviana acueye l'actu institucional por mor del 8M, Día Internacional de les Muyeres

El presidente del Principáu d'Asturies, Adrián Barbón, naguó esti vienres por blindar dientro de la Constitución española los derechos de les muyeres pa responder a la "involución que percuerre'l mundu".

"Énte esta realidá nun voi mirar pa otru llau. Nun podemos quedar indiferentes. Aspiro a que nos miremos nos espeyos de la vanguardia y animo a les fuerces parlamentaries a blindar los derechos de les muyeres na Constitución española", sorrayó Barbón na so intervención nel actu institucional que se celebró en Llaviana por mor del 8M, Día Internacional de les Muyeres.

El presidente recordó que'l feminismu ye "una vanguardia con nada menos que tres sieglos de vida" y llamentó que "cada progresu pa los derechos y llibertaes de les muyeres siga una reacción involucionista y patriarcal".