Barbón reclama al Gobiernu esplicaciones pola baxa execución presupuestaria

El presidente del Principáu asegura que'l so Gobiernu "declaró la guerra" a la burocracia

El presidente del Principáu, Adrián Barbón, pidió al ministru de Presidencia, Félix Bolaños, esplicaciones pol baxu grau d’execución de les inversiones previstes n’Asturies nos Presupuestos Xenerales del Estáu del añu pasáu, namás superior a la rexistrada en Cataluña, según un informe del Ministeriu de Facienda.

"La mio posición ye clarísima de crítica a esta baxa ejecución", afirmó güei’l xefe del Executivu asturianu nel plenu de la Xunta Xeneral del Principáu al responder a la entruga que-y fizo la portavoz del grupu popular, Teresa Mallada, sobre’l balance que facía del grau de cumplimientu con Asturies del Gobiernu de Pedro Sánchez.

Per otru llau’l presidente del Principáu, Adrián Barbón, afirmó que lidera un Gobiernu "profundamente tresformador" que "declaró la guerra a la burocracia" col propósitu de que l’alministración asturiana seya "más áxil, más eficaz y más eficiente".

Adrián Barbón tamién considera que "va ser cuasi imposible como puntu de partida", poder aprobar los presupuestos autonómicos de 2023, una cuestión que sedrá, xunto a l’actividá llexislativa, la prioridá del so gobiernu nos doce meses que falten de llexislatura.

Pa rematar, el presidente del Principáu dixo esti miércoles que’l Gobiernu asturianu ta dando los "últimos pasos" pa presentar nel parllamentu una llei integral que recueya los derechos de les persones trans y LGTBI, que tien que ser "garantista".