Barbón saca alantre'l so mayor presupuesto ente reproches de la izquierda

Ciudadanos pide respetu pa un partíu "mui vivu, polo menos hasta 2023"

El Gobiernu socialista d'Adrián Barbón sacó esti xueves alantre los sos terceros presupuestos autonómicos col sofitu de cuatro de los cinco diputaos de Ciudadanos y de los dos d'IX, anque dende la coalición ficiéronlo entre reproches pol acercamientu de los socialistes al partíu naranxa, al igual que fixo Podemos al xustificar la so abstención énte unes cuentes que van xubir el gastu hasta los 5.354 millones, un 2,2 % más.

Como s'esperaba, escontra de la mayor parte del dictame de la Llei de Presupuestos del Principáu pa 2022, que va entrar a valir dientro de dos díes, votaron Populares, Foro y Vox que vieron amás cómo yeren refugaes les más de 140 enmiendes de parcialidá que los dos primeros grupos presentaren al testu presupuestariu.

Sí qu'hebo sorpresa ente les files de Ciudadanos yá que, Luis Armando Fernández Bartolomé, enfrentáu cola actual dirección del partíu, decidió romper la disciplina de votu y abstúvose na votación del gruesu del dictame, mientres que lo fixo escontra de la disposición que plantega faer pública la Sociedá de Xestión y Promoción del Suelu.