Barbón saca alantre la so Executiva con un respaldu del 64,4%

La nueva Executiva tará formada asina por 32 miembros

El secretariu xeneral de la FSA, Adrián Barbón, proclamó güei que "el cambéu llegó" a un partíu que quier abrise a la sociedá con una Executiva monocolor y ensin representantes del sector agora minoritariu que perdió les primaries nacionales y rexonales apoyando a Susana Díaz y José María Pérez.

Nel so discursu pa pesllar una asamblea qu'inxertó al programa socialista impulsar la oficialidá del asturianu cuando se dea la reforma del Estatutu d'Autonomía, Barbón reclamó un partíu "en pie" y abiertu a alcuerdos d'izquierdes con Podemos y IX dempués de superar el periodu marcáu pol Comité Federal que va un añu provocó la dimisión de Pedro Sánchez.

Esi procesu, y el nomamientu darréu d'una xestora liderada por Javier Fernández, del que güei tomó'l relevu dempues d'un mandatu de 17 años na FSA, supunxo, a xuiciu de Barbón, que la militancia "nunca más diba tar pasiva" nos debates internos.

Dempués d'algamar un sofitu del 64,4% pa la so Executiva y un 34,6% de votos en blancu, el nuevu secretariu xeneral trelladó'l so sofitu al Gobiernu de Fernández pa siguir el so "gran llabor" nos dos años que queden de llexislatura.

A xuiciu de so, la FSA tien qu'invitar a sumase a tola sociedá pa impulsar un nuevu proyectu de cambéu que pasa tamién por algamar alcuerdos con Podemos y IX -colos que'l PSOE suma una gran mayoría nel Parllamentu autonómicu- por mor que nun se pue siguir "xugando a tacticismos" nin entrar en xuegos de reproches.

"Yá valió, ye hora de que nos sentemos en serio a falar y a alcordar. Nun busco culpables, pero sí esixo rempuestes", apuntó dempués de los desalcuentros siguíos del PSOE asturianu sobre manera con Podemos, y alvirtió a la formación morada de que, de nun facelo, tanto los sos votantes como los d'IX o los socialistes entrugarán a cada formación en 2019 "pa qué sirvió'l so votu".

Tamién nel pieslle del Congresu, y al igual que nel procesu enantes de les primaries, Barbón cuntó col sofitu de la vicesecretaria xeneral del PSOE, Adriana Lastra, pa tresllada-y el "total" sofitu de la Executiva Federal del partíu.

"Hai momentos nos qu'hai que ser valiente como fueron miles y dar un pasu al frente", apuntó dempués de defender que nel añu pasáu dende'l Comité Federal que descabalgó a Sánchez intentó ser "honesta, digna y lleal", y poner a Barbón como exemplu d'esa valentía y recordar que dambos caminen al empar "va venti años".

Nel so discursu, la vicesecretaria xeneral del PSOE refugó que la supuesta crisis de la socialdemocracia nun ye tal, sinón la de "dalgunos socialdemócrates" que pacten cola derecha, como n'Alemaña, pero non la d'aquellos que, como n'Inglaterra o Portugal, opten por buscar alcuerdos nel ámbitu de la izquierda.

Menos satisfechu amosóse'l candidatu derrotáu nes primaries, que llamentó l'ausencia de representantes ayenos al sector que respaldó a Barbón na dirección escoyida nel Congresu.

En declaraciones a los periodistes, Pérez señaló que la negociación con Barbón duró malapenes quince minutos por mor de que treslladó-y una composición de la Executiva na que nun teníen sitiu dirixentes que nun respaldaren la candidatura del secretariu xeneral escoyíu polos militantes nes primaries.

"Hai munches persones que, ensin apoyalu podríen tar aportando nesi equipu, pero nun yera'l plantegamientu que tenía. Respétolu, pero nun lu comparto", apuntó al acabar l'asamblea.

Dende agora, apuntó, el sector que lidera actuará "con llealtá" treslladando los sos criterios a los muérganos del partíu -Comité Federal y Autonómicu- a los que presentaron candidatura alternativa.

Barbón, de 38 años, y alcalde de Llaviana -cargu qu'abandonará'l 10 d'ochobre viniente- asítiase asina al frente d'una Executiva cuasi renovada dafechu al respective de la última de Javier Fernández y que supón tamién un relevu xeneracional nel PSOE asturianu.