Bimenes ye unu de los conceyos onde más se fala asturianu

Los Yerbatos contribuyen a la recuperación del patrimoniu folclóricu

Bimenes declaró l'asturianu llingua oficial un 4 de xunetu de 1997. Dende'l primer momentu, los sos impulsores teníen claro que la ordenanza diba ser anulada pola xusticia, pero l'oxetivu yera dar visibilidá a la situación llingüística nun conceyu nel que l'asturianu taba mui vivu. L'escritor y filólogu Xulio Vixil vivió aquel revolucionariu branu mui de cerca.

Amás de ser unu de los conceyos nos que más se fala asturianu, Bimenes cunta con un activu movimientu social. Unu de los colectivos más inquietos ye l'Asociación de Muyeres, pionera nes movilizaciones feministes.

Los Yerbatos ye otru de los colectivos más representativos de Bimenes. Una agrupación que, dende los sos entamos, foi recuperando patrimoniu folclóricu del olvidu. Con actividaes de baille o teatru, y impulsando la escuela de música tradicional, Los Yerbatos tamién faen un gran llabor de promoción del conceyu.

Otra de les tradiciones que tuvo a puntu de cayer nel olvidu y resurdió con fuerza en Bimenes son los Sidros, que'l pasáu mes de febreru tornaron a Santuyano casi un sieglu dempués de la so última actuación.

Amás, el conceyu cunta con un muséu dedicáu a la radiodifusión, la Casa les Radios de Suares. Ellí espónense más de 300 aparatos de toles dómines, amás de gramófonos, gramoles o discos.