Cachero y USO aseguren que Villa y Postigo influyíen na paz social por perres

Postigo pidió a Cachero 20 millones de pesetes al mes si quería trabayar tranquilu

Rodolfo Cachero aseguró énte la Guardia Civil que José Antonio Postigo, en nome del SOMA, pidió-y el pagu mensual de 20 millones de les antigües pesetes si quería trabayar tranquilu.

Foi a entamos de los 90, cuando Cachero compró la sociedá minera Jovesa. Cachero declaró que, al nun ceder al chantaxe, entamaron les fuelgues y les denuncies.

L'empresariu, güei dueñu de la compañía minera Asturlleonesa, en Zarréu, fala de persecución al traviés de denuncies y querelles. Dempués d'una d'elles, foi condergáu por un delitu fiscal y tuvo qu'abandonar temporalmente'l negociu mineru.

El que fuere responsable d'acción sindical de la federación d'industria d'USO, José Vía, destaca la preocupación de José Ángel Fernández Villa por que los fondos de formación siguieren llegando al sindicatu.

Esti responsable d'USO relató énte los investigadores conversaciones que se daben nes meses de negociación nel añu 2012.

Nuna d'elles Villa echa en cara a Victorino Alonso la so falta de sofitu pa que'l dineru pa formación lo xestionen los sindicatos y recuérda-y los favores prestaos, a lo que l'empresariu lleonés retrúca-y qu'esos favores tán bien pagaos.

La UCO tamién llamó a declarar a una de les ex-pareyes del que fuere presidente del Montepío, José Antonio Postigo.

Daniela Cosbuc entamó como recepcionista nos apartamentos de Roquetas de Mar y en dos años llegó a directora del centru almeriense por decisión personal de Postigo, el mesmu, que según la muyer, echóla ensin motivos cuando la rellación terminó cuatro años dempués.

Cosbuc denunciaba nuna carta abusos y irregularidaes de tou tipu por parte de Postigo, anque na so declaración policial alega que foi por despechu.

A pesar del so cargu, Cosbuc asegura que namái rexistraba les factures que se pagaben dende Uviéu.