Carmen Moriyón dimite dempués de los malos resultaos de Foro nel 26M

L’alcaldesa de Xixón asume la "responsabilidá política" de la derrota

La presidenta de Foro y cabeza de llista d’esti partíu a les elecciones autonómiques, Carmen Moriyón, dio anuncia esti miércoles de la so renuncia al acta de diputada qu’algamó nes elecciones del domingu pasáu pal Parllamentu asturianu.

Moriyón faló dempués d’acabar la xunta de la Comisión Directiva del partíu qu’analizó los resultaos algamaos nes elecciones autonómiques, nes que Foro baxó la so representación na Xunta Xeneral de tres a dos diputaos.

Nesos comicios, Foro algamó 34.388 votos que suponen una perda de más de 10.000 sofitos y, nel casu de les municipales, pasó de 83 a 49 conceyales nos 78 conceyos asturianos amás de perder el Gobiernu de Xixón, de la que Moriyón foi alcaldesa los últimos ocho años.

"Los resultaos algamaos por Foro nes elecciones autonómiques alloñáronse a esgaya de los oxetivos previstos. Como cabeza de la candidatura y candidata a la Presidencia del Principáu, asumo la responsabilidá política de la derrota nes urnes", señaló.