Central Llechera Asturiana medra'l sofitu al deporte xixonés

El Grupu Capsa, patrocinador del Hípicu y la San Silvestre de Xixón

La Corporación Alimentaria Peñasanta (Capsa), grupu qu'axunta a delles empreses como Central Llechera Asturiana, robló esti llunes na Feria de Muestres un conveniu col Conceyu de Xixón pa entamar y patrocinar dellos eventos deportivos: l'Hípicu, la carrera de San Silvestre y el Cross Popular.

Nun actu nel stand de Central Llechera Asturiana, l'alcaldesa de la ciudá, Carmen Moriyón, celebró'l compromisu que la empresa tien con Asturies y, en concreto, la "sólida presencia" en Xixón, lo que da "prestixu y enfotu", valoró.

Pa la rexidora, la ciudá más poblada d'Asturies tien qu'afitase n'empreses "piqueres y comprometíes cola so redolada", como, al so xuiciu, ye'l casu de Capsa, que tien una relación cola rexón que “tresciende" la firma del mentáu conveniu.