Cerráu por coronavirus

Aglomeraciones nos supermercaos pa garrar bien de cebera

Primer xornada na hostelería asturiana baxo'l decretu del Principáu qu'ordena'l cierre de tolos chigres, restauranes, comercios y establecimientos que nun seyan básicos. Na mañana chigres y restauranes asturianos fueron cerrando al públicu, informaos, en muchos casos pola Policía Local.

La suspensión de xera, sicasí, nun afecta a les xeres de preparación y distribución de comida a domiciliu y gran parte de los locales apuesten por caltener el serviciu, siguiendo un protocolu d'actuación que nun esponga a los repartidores.

Aglomeraciones nos supermercaos pa garrar cebera

Supermercaos de ciudaes y pueblos asturianos rexistraron esta mañana delles aglomeraciones. La imaxe de coles nos supermercaos y carros enllenos de productos repitiéronse dende primer hora d'esti sábadu, ante la situación d'emerxencia xenerada pola pandemia del coronavirus.

La gran cantidá de veceros que tán diendo a los supermercaos ta provocando que s'estrinquen los productos en munches de les estanteríes ensin que los trabayadores tengan tiempu de reponelos.

El ministru d'Agricultura, Pesca y Alimentación, Luis Planas, fizo esti sábadu un llamamientu a la calma y conseñó que "nun tien sen acumular", en rellación a los últimos episodios de compres masives nos supermercaos, porque "los suministros tán garantizaos".

Cierre na zona rural d'Asturies

Cais ermes, restauranes cerraos y hoteles que despidieron a los últimos turistes, foi la realidá nes zones más rurales de la rexón.

Un casu peculiar dase na tienda chigre de Santalla (Ozcos). A les 12:00 en puntu tuvo que cerrar la puerta, pero namás la parte destinada al chigre. Con un biombu acotóse esa zona, porque la otra parte del negociu, d'alimentación, sí pue tar abierta. Cuasi 100 años tien esti negociu y nunca tuviera que cerrar.

Los vecinos conseñaron les compres pa tener de too en casa. Les carniceríes puen tar abiertes, pero otros negocios, como peluqueríes, tuvieron que cerrar. Los turistes qu'había nel conceyu de Santalla tienen que marchar porque los hoteles yá nun puen tar abiertos.