Chamorro defende la comarcalización de los Xulgaos de la Violencia escontra la Muyer

"Hai que revisar el sistema, porque sigue habiendo fendidures" asegura la directora xeneral d'Igualdá

El presidente del Tribunal Cimeru de Xusticia d’Asturies (TCXA), Jesús María Chamorro, defendió esti miércoles la comarcalización de los Xulgaos de la Violencia escontra la Muyer, un proyectu entá "embrionariu" que tendrá que cuntar col consensu de toles partes implicaes y un esfuerzu inversor pa que salga alantre.

Asina lo comentó, en declaraciones a los periodistes, enantes de participar na xunta añal de la comisión provincial de coordinación escontra la violencia de xéneru.

Anguaño, Uviéu y Xixón cunten con xulgaos especializaos nesta materia, mientres que los dieciséis partíos xudiciales restantes compártenla con otros asuntos.

Chamorro amosóse partidariu d’una comarcalización, porque dexaría concentrar estos asuntos en xulgaos "concretos", lo qu’implicaría la creación de "dos o tres" nuevos, una cuestión "positiva" pa los xueces al poder tar dedicaos n’esclusiva a estos asuntos.