Con 23 años, Ricardo Suárez convirtióse nel primer alcalde de la democracia de Somiedu

El socialista Belarmino Fernández Fervienza ta al frente del consistoriu dende 1995

Con 23 años, Ricardo Suárez convirtióse nel primer alcalde de la democracia de Somiedu, y el rexidor más mozu d’España. Llegó al cargu ensin esperiencia pero con ilusión, encabezando la candidatura del Partido Socialista. Apostó por meyorar la sanidá y la educación. N’ocho años de mandatu, tamién entamaron les obres de les principales carreteres del conceyu.

En 1987, el PSOE volvió a ganar les elecciones, con Aurelio Álvarez como candidatu. Meyorar les entrades a los pueblos, habilitar teléfonos públicos y la trayida d’agua en dalgunos pueblos fueron les sos prioridaes. Álvarez gobernó dos llexislatures y, ensin dulda, el so mayor éxitu foi convertir a Somiedu en Parque Natural en 1988.

Dende 1995, el socialista Belarmino Fernández Fervienza ta al frente del consistoriu. Acometer meyores nel ciclu del agua, el caltenimientu de les carreteres o combinar desendolcu y caltenimientu fueron dalgunes de les sos prioridaes.

L’alcalde d’anguaño considera que meyorar les telecomunicaciones o diversificar la economía son dalgunos de los retos de Somiedu.