Condenaos a 33 años la madre d'Imran y la so ex-pareya

Consideren a David, autor material del crime, y a Fadila, culpable por omisión

L'Audiencia Provincial d'Uviéu condergó a una pena individual de 33 años y cinco meses de cárcel a Fadila Chardoud y a la so ex-pareya David Fuentes pol asesinatu del fíu d'ella, de 21 meses. El so calabre atopóse nuna maleta cerca d'un apeaderu de tren d'Uviéu en payares de 2014.

La sentencia, dictada tres el veredictu de culpabilidá del xuráu popular, corderga a David, de 36 años y natural de Cambre (A Coruña), como autor material de los delitos de malos tratos, lesiones, asesinatu, y a la madre de 24 años y nacionalidá marroquín, como autora por omisión.

Amás, la resolución xudicial, escontra la que pue haber recursu d'apelación, conderga a dambos como autores materiales d'un delitu de profanación de calabre, reconoz les agravantes de parentescu nos cuatro delitos y tamién-yos impón el pagu d'una indemnización de 100.000 euros a dos familiares del menor asesináu.

El fallu considera probao, acordies col veredictu del xuráu, que dende setiembre de 2014, cuando se treslladaron a vivir de Málaga a Uviéu, David Fuentes pegó y maltrató físicamente al meñu, na mayoría de les veces en presencia de la madre ensin qu'ésta ficiera nada pa evitalo.

Nuna ocasión, l'home llegó a rompe-y al rapacín una costiella y, tiempu más tarde, el fémur derechu d'un fuerte puñetazu na pierna ensin que'l neñu recibiera asistencia médica dalguna.

Nesti últimu episodiu de violencia, conseña'l fallu, la madre tamién tuvo presente y "omitió de manera voluntaria toa ayuda dirixida a auxiliar al so fíu".

Na última selmana d'ochobre de 2014, nun día que nun se pudo precisar, David dirixóse al cuartu del neñu y, "ensin motivu aparente", entamó a pegalu per tol cuerpu y a tiralu con violencia escontra la paré, la cama y el suelu lo que-y provocó "milenta fractures ósees y orgániques" que-y provocaron la muerte, too ello tamién en presencia de so madre.

El calabre del menor, que según los forenses llevaba muertu polo menos tres díes, foi atopáu nel interior d'una maleta el 3 de payares de 2014 por operarios de caltenimientu d'Adif mientres facíen llabores de desbroce xunto a les víes de tren, ente l'apeaderu de FEVE y el barriu de Vallobín de la capital asturiana.

Tres cometer el crime y abandonar el cuerpu, dambos fuxeron a Lleón, onde fueron deteníos el 11 de payares tres un intensu operativu de busca y tres llamar l'home al 112 pa entregase ante la presión policial.

David Fuentes yá fuera condergáu en sentencia firme en marzu de 2004 por un delitu de mancadures nel ámbitu familiar y en setiembre de 2006 por otru de quebrantamientu de condena

Amás, el pasáu mes de payares aceptó una pena de seis meses de cárcel, que foi sustituyida por 180 díes de trabayu en beneficiu a la comunidá, por un robu fechu díes enantes del crime nel taller onde trabayaba n'Uviéu.