Condergáu a 12 años de prisión el mozu acusáu de matar a David Carragal

La sentencia conderga a los otros dos mozos a multes de 2.250 euros por omisión del deber de socorru

L'Audiencia Provincial d'Uviéu impunxo una pena de dolce años de prisión al mozu de 20 años acusáu de provocar la muerte por una patada na cabeza al profesor pixuetu David Carragal, de 33 años.

La Sección Tercera de l'Audiencia impunxo esta condena dempués de que'l xuráu popular declarara al mozu culpable por unanimidá d'un delitu d'homicidiu dolosu por unos fechos que socedieron na madrugada del 11 de xunu de 2019 cuando Carragal abandonaba les fiestes de La Florida d'Uviéu en compañía de dos amigues y atoparon a tres mozos, qu'entós teníen ente 18 y 19 años.

La sentencia conderga a los otros dos mozos a dos multes de 2.250 euros por un delitu d'omisión del deber de socorru por fuxir del llugar dempués de que'l principal procesáu cometiera l'agresión, que provocó la muerte de Carragal dellos díes dempués.