Convocaos ocho díes de fuelga nos supermercaos asturianos en Navidá

Los trabayadores reclamen una meyora de les condiciones salariales y sociales del conveniu colectivu

Los sindicatos UXT, CCOO y USO acordaron esti domingu n’asamblea convocar una fuelga d’ocho díes nes tiendes minoristes d’alimentación del Principáu, nes que trabayen más de 12.000 trabayadores, na campaña de Navidá pa refugar la ufierta de xuba salarial de la patronal y que supón una media d’ente 10 y 11 euros mensuales.

Según informó a Efe’l secretariu xeneral de la Federación de Servicios de CCOO, Alfredo García, los paros acordaos esti domingu tán convocaos pa los díes 21, 22, 23, 24, 28, 29, 30 y 31 d’avientu.

El dirixente sindical afirmó que los trabayadores del sector acordaron esta midida n’asamblea col envís de reclamar una meyora de les condiciones salariales y sociales del conveniu colectivu.

Va un añu yá convocaron una fuelga de seis díes en Navidaes que finalmente se desconvocó dempués d’asumir la patronal una xuba llinial de 50 euros mensuales pa unos trabayadores que, de media, cobren menos de 14.000 euros al añu.

Esta desconvocatoria condicionóse a que nesti añu se negociaren meyores llaborables pal colectivu, que demanda un día más de vacaciones, que los 25 minutos del café se consideren parte de la xornada trabayada o qu’haya una reconocencia de categoríes profesionales col pasu los años trabayaos.