Costco enfrenta a Siero y Principáu

Ángel García pide participar nel grupu de trabayu que camudará les directrices de comerciu

L’alcalde de Siero, Ángel García, aseguró esti llunes que "lo que nun se puede ye dicir agora" que se va actuar pa "reformar daqué" que’l Conseyu de Gobiernu "yá acordó" el 1 de xunetu de 2022, en referencia a la constitución d’un grupu de trabayu que ponga a puntu les directrices de comerciu.

Asina lo aseguró’l rexidor sierense sobre la polémica abierta que tien col Executivu autonómicu énte los planes de la multinacional Costco pa instalase nesti conceyu, y dempués de que’l presidente del Principáu, Adrián Barbón, avanzare ayeri qu’esta selmana crearáse un grupu de trabayu que ponga a puntu les directrices rexonales de comerciu nel que participarán les conseyeríes implicaes, la patronal, los sindicatos, la federación de conceyos y les cámares de comerciu.

L’alcalde de Siero teme que se pierda una inversión d’unos 40 millones d’euros y que podría suponer la creación de 200 puestos de trabayu pol retrasu de l’alministración asturiana nel afayamientu de les directrices que rixen l’apertura de grandes superficies comerciales.

El Gobiernu dio anuncia va dos años de la revisión de les actuales directrices rexonales de comerciu vixentes n’Asturies dende va 14 años, que llenden l’apertura de tiendes de más de 2.500 metros cuadraos y pa les que l’alcalde reclama un cambéu pa favorecer la llegada de la cadena norteamericana de supermercaos al polígonu de Bobes.