Coxersa asume'l serviciu de recoyida de basura en Llaviana

El personal municipal va pasar a reforzar el serviciu de llimpieza

Dende esta mañana los camiones de Coxersa son los encargaos de recoyer la basura en Llaviana. El conceyu acaba de dexar les competencies al consorciu.

Con esta midida'l consistoriu quier optimizar los recursos municipales y potenciar la recoyida selectiva. El conceyu recicló l'añu pasáu solo un 17% de los residuos, bien lloñe del 55% qu'afita la Xunión Europea pal próximu añu, esplica Julio García, alcalde de Llaviana.

Los siete operarios que daben hasta agora'l serviciu van pasar a facer otres funciones nel serviciu municipal de llimpieza, que se va ver reforzáu cola compra de nueva maquinaria.

L'únicu cambéu va ser pa los vecinos de Los Barreros, que yá nun van poder usar los contenedores soterraos. Van quedar fuera de serviciu hasta que s'instalen unos nuevos.

Tres quince años en funcionamientu tán mui deterioraos.

La previsión ye que puean entrar en serviciu nunos 5 meses y incorporen un nuevu contenedor pa residuos orgánicos.