Cultura y etnografía en Llaviana

Armando Palacio Valdés o'l Descensu Folklóricu del Nalón, referentes del conceyu

Llaviana tien una gran figura cultural d'ámbitu internacional, l'escritor y críticu lliterariu Armando Palacio Valdés. Nació n'Entrialgo, nuna casa reconvertida agora nun centru de referencia pa estudiar la so obra.

Dende'l 2003, la casa onde nació Palacio Valdés, en 1853, convirtióse en centru d'interpretación, l'epicentru del conocimientu sobre l'escritor en Llaviana, Asturies y el mundu.

Ehí tamién entama una ruta teatralizada que lleva'l nome d'una de les sos obres más emblemátiques, 'La aldea perdida', sobre costumes del pueblu.

Per otru llau, el platu tradicional de Llaviana ye'l cabritu con patatinos y bartolos. Cuenta con unes xornaes añales nes que participen los más importantes locales hosteleros del conceyu, nel mes de marzu.

Pero la gran fecha señalada nel calendariu local ye la del Descensu Folklóricu del Nalón, n'agostu. Un multitudinariu desfile acuáticu con temátiques de toa triba. Cada añu'l Descensu medra, algamando nes últimes ediciones los 4.000 tripulantes en más de 40 embarcaciones.

Y ye que l'ambiente y el carácter llavianés siempres foi mui festivu y allegre. N'años, el conceyu foi referente n'ociu nocherniegu y sigue conservando esi espíritu de diversión ente la so xente.