Cúmplense dos años del asesinatu d'Ardines

El xuiciu va ser en 2021 y va cuntar con xuráu popular

Yera la madrugada del 16 d'agostu de 2018. Javier Ardines salía de la so casa en Belmonte (Pría) pa faenar col so barcu. Según les investigaciones, los sos presuntos asesinos intentaron corta-y el pasu por aciu d'unes valles pa que tuviera que baxar de la furgoneta. Diéron-y una cuera y afogáronlu.

Hebo qu'esperar seis meses a que la Guardia Civil punxera fin con cuatro detenciones a les munches especulaciones alredor del crime.

La Fiscalía considera que Pedro Luis Nieva tomó la decisión d'acabar cola vida de Javier Ardines en xunetu de 2018, unos meses dempués de conocer la relación qu'ésti tenía cola so muyer.

Contactó entós con Jesús Muguruza que lu punxo, según la Fiscalía, en contactu colos dos presuntos sicarios alcordando un preciu a pagar de 25.000 euros.

El primeru, Nieva, sedría l'autor intelectual y el segundu, Muguruza, cooperador necesariu. A los dos sicarios arxelinos considérenlos autores materiales.

El postreru de los cuatro n'ingresar en prisión en territoriu nacional foi Maamar Kelli, tres ser apurríu en mayu poles autoridaes suices, onde taba cumpliendo condena por otros delitos.

El Ministeriu Fiscal considera a los cuatro responsables d'un delitu d'asesinatu con alevosía y mediando preciu.

Anguaño los cuatro acusaos tán en distintes cárceles.

El xuiciu va ser en 2021 y va cuntar con xuráu popular.