Danone dexa de recoyer lleche

El mayor suministrador lacteu de la compañía afirma tar empobinada al zarru

El mayor suministrador de lleche de Danone n'Asturies diz tar empobináu al zarru tres la decisión de la compañía francesa de dexar de recoyer nel Principáu. Cree que detrás ta una intención de traer lleche d'otros países y d'abaratar el costu del productu. Daqué que va soceder, dicen los ganaderos, pol superávit de lleche que se va xenerar n'Asturies tres la decisión de Danone y de Mantequerías Arias.

La ganadería El Pandiellu, de Sotu (Les Regueres), ye dende fai 30 años el mayor suministrador de lleche de Danone n'Asturies, con cuasi dos millones de llitros al añu, 5.000 llitros al día. Con una esplotación de 260 vaques y seis puestos de trabayu, la decisión de la compañía francesa de dexar de recoyer lleche nel Principáu llévalos al zarru.

Los ganaderos critiquen amás les formes de Danone de comunica-yos la so decisión, al traviés d'un burofax. Y sollerten de les consecuencies pal sector na rexón.

En Salas, los afectaos tán sorprendíos y a la espera de que la compañía dea anuncia de la decisión. Nel aire queda agora que la fábrica de mozzarela que mercó les instalaciones de Danone, recueya la so lleche. Daqué que, dicen, entá nun-yos confirmaron.

El problema nun afecta solo a los ganaderos que suministren a Danone, dellos productores temen que Mantequerías Arias dexe de recoyer lleche, a pesar de que la organización Asaja diz que la empresa caltién el so compromisu hasta que llegue una nueva empresa. Dende l'Asociación agraria piden a Danone esi mesmu comportamientu y tresparencia colos ganaderos. Pidimientu que tamién fai Coag, que califica d'indignu'l comportamientu de Danone.

Dende'l Gobiernu del Principáu califiquen la noticia d'esmolecedora y aseguren que van mediar pa intentar buscar una solución. Critiquen amás que se dexe "vendíos" a los ganaderos.