David y Fadila cúlpense ente ellos del asesinatu d'Imran

La madre cuntó que tanto ella como'l neñu fueron maltrataos

David F. y Fadila C., acusaos del asesinatu del fíu d'ella, Imran, de 21 meses, del que foi atopáu'l calabre nuna maleta cabo un apeaderu de tren d'Uviéu en payares de 2014, negaron la so responsabilidá nos fechos y culpáronse l'unu al otru del crime.

La Sección Tercera de l'Audiencia Provincial d'Asturies acoyó güei la primer sesión del xuiciu con xuráu nel que dambos encaren una pena individual de 33 años y mediu de cárcel.

La Fiscalía considera que l'home foi l'autor material del asesinatu y que la muyer nun fixo nada pa evitalo nin ayudó al menor, y atribúye-yos los delitos d'asesinatu, maltratu habitual, mancadures y profanación de calabres, col agravante de parentescu.

Tres la escoyeta del xuráu, la primera en declarar foi la madre del menor, que, ente llárimes, rellató que tanto ella como'l neñu fueron maltrataos por David, pero que nunca s'altrevió a denuncialu porque la amenazara de muerte y hasta con españa-y la "cabeza" al neñu.

Fadila aseguró que la so pareya obligóla a exercer la prostitución, primero n'Uviéu y dempués en Lleón, onde dambos fueron deteníos el 11 de payares de 2014, díes dempués del afayu del calabre del neñu dientro d'una maleta cabo l' apeaderu de L'Argañosa-Vallobín, na capital asturiana.

L'acusada desplicó que la nueche en que'l neñu sufrió la mortal paliza ella nun taba en casa y que nun foi hasta'l momentu de la so detención cuando s'enteró de que dambos taben en busca y captura pola muerte del so fíu, yá qu'él dixéra-y que'l menor taba cola so hermana.

Pela so parte, David F., que namás respondió a les entrugues del so abogáu, negó rellación dalguna col asesinatu del menor, del que responsabilizó a la madre.

L'acusáu, que tamién negó que maltratara al neñu o a la so madre, dixo qu'un día, al llegar a casa, el neñu nun taba na vivienda y que la madre díxo-y que lu mandara cola so familia a Málaga.

De siguío, amestó, la muyer pidió-y colar pa Lleón, onde, según la so versión, díes dempués confesó-y que se-y fuera la "mano" y pidió-y ayuda porque taba embaranzada d'él.

Foi entós cuando entró n'Internet y decatóse de que dambos yeren buscaos pola Policía pola muerte del neñu, aseguró.
"Mentira. Matasti al mio fíu", glayó Fadila al escuchar la versión de David, enantes que dellos axentes la sacaren, al acabar la sesión, por mor del ataque de nervios que sufrió.

Según la Fiscalía, l'acusáu pegó y maltrató físicamente al menor davezu, fechos que na mayoría de les ocasiones llevó alantre en presencia de l'acusada, ensin qu'ésta ficiera actu dalgunu pa evitar el maltratu o, nel so casu, ponelu en conocencia de terceros.

L'escritu provisional d'acusación del Ministeriu Públicu rellata que la muerte foi na última selmana del mes d'ochobre de 2014, cuando l'home foi pal cuartu qu'ocupaba'l menor y entamó a pega-y na cara milenta vegaes, lo que fizo que'l neñu llorara desesperadamente.

L'acusáu, amiesta la Fiscalía, respondió garrándolu fuertemente y, polo menos en tres veces, llanzólu violentamente escontra la paré, la cama y el suelu del cuartu, dándo-y puñaes nel abdome y otres partes del so cuerpu, lo que-y causó mancadures que-y provocaron la muerte.

Nesi momentu taba igualmente presente la madre, que, pudiendo auxiliar al so fíu, omitió de manera voluntaria toa ayuda, sorraya'l Ministeriu Públicu.