Decenes de manifestantes reclamen n'Uviéu más recursos pa Xarrio

Reclamen que se cubran toles vacantes y servicios que nun cunten con personal abondo

Dellos cientos de persones, na so mayoría procedentes del occidente asturianu, manifestáronse güei pel centru d'Uviéu pa denunciar les faltes que tien l'Hospital comarcal de Xarrio, y reclamar que se cubran toles vacantes y servicios que nun cunten con personal abondo nesti centru de referencia pal noroccidente d'Asturies.

L'asociación 'Toos Somos Xarrio', convocante de la protesta, cuntó col sofitu de diputaos del PP, Ciudadanos, Podemos, Foro y Vox, que se sumaron a la marcha que salía pasaes les 12:30 de la Estación del Norte de la capital del Principáu.

Tres una pancarta na que podía lleese 'Por una sanidá pública, digna y de calidá... y por Xarrio', la manifestación trescurrió ente pitíos y gritos de 'Toos somos Xarrio' hasta la Xunta Xeneral del Principáu, énte la que se lleó un manifiestu en defensa d'una sanidá digna en tol noroccidente.

Según la presidenta de l'asociación, Mar Villanueva, ye necesario siguir lluchando pa siguir consiguiendo meyores nesti centru, nel que se necesiten sobre manera los servicios de Pediatría y Xeriatría, dau'l nivel d'avieyamientu que presenta la población.