Degaña destaca pola so diversidá natural y paisaxística ​

Ye un llugar privilexáu pal avistamientu de fauna

El conceyu de Degaña configúrase como un valle d’orixe glaciar, llargu y estrechu, nel cursu altu d’El Ríu Ibias. A un llau y a otru del valle, unes vistes d’escepción dende’l mirador de La Corza, en Zarréu, o l’atalaya de L’Altu’l Capillu. Un primer averamientu a les sos impresionantes recursos naturales.

La contornada de Trabáu o’l mirador habilitáu en Fonduveigas son llugares privilexaos pal avistamientu d’osos. Conocer de primer mano’l so hábitat y siguir el so rastru. La primavera y el final del branu son la meyor época y les posibilidaes d’éxitu son mui altes.

Siguiendo colos recursos naturales, en Zarréu inviten a conocer el Bosque Máxicu una ruta ente carbayos, fayes, o texos, que se configuró como un itinerariu simbólicu polos raigaños celtes.

Tamién hai qu’aprovechar la poca contaminación llumínica pa esfrutar de los cielos nocherniegos na llaguna de L.langreiros.

Nel apartáu de patrimoniu, el proyectu 'Zarréu Paisaxe Cultural' propón dos rutes saliendo de la sede la parroquia rural, la primera hasta l’área d’A Col.lada, un itinerariu interpretativu polos restos de la minería.

El segundu itinerariu, atraviesa Zarréu y va siguiendo’l cursu fluvial que guarda dellos molinos hasta los restos d’un fornu de cal.

Ente’l patrimoniu relixosu destaquen la ilesia parroquial de Santiago, en Degaña, y la de Santa María en Zarréu, declarada Bien d’Interés Cultural, y na que sobresal l’artesanáu que sigue la tradición mudéxar, mui poco común n’Asturies.

Exemplu de l’arquitectura civil ye Casa Florencio, una construcción en forma de "L", del sieglu XIX, con horru y capiya. Remocicada como centru d’interpretación del parque natural nun llegó a inaugurase, anque l’Ayuntamientu de Degaña confía en poder abrila esti branu como Oficina de Turismu del conceyu.

Tamién remocicada y ensin usu la fábrica de la lluz de Degaña, una minicentral construida nos años 20 pa llevar el suministru a los pueblos de Degaña y Fonduveigas. Recuperáronse antiguos elementos y maquinaria y esperen poder entamar yá les visites.