Desactiváu tres seis díes el protocolu por contaminación del aire

Meyora de los niveles de partícules en suspensión

La Conseyería d'Infraestructures, Mediu Ambiente y Cambéu Climáticu desactivó esti domingu'l protocolu d'actuación n'episodios de contaminación pola meyora de los niveles de partícules en suspensión PM10 y PM2,5 rexistrada en tol área central d'Asturies.

N'Uviéu, el protocolu activóse'l día 30 d'avientu por cuenta de los malos datos de les partícules nes estaciones que miden la calidá del aire en Llugones y na redolada del Palaciu los Deportes.

Amás, na zona de les cuenques taba activu dende'l día 31 d'avientu, en nivel preventivu, polos niveles rexistraos en Sama y La Felguera.

La concentración de partícules PM2,5 (menores de 2,5 micres), les más fines, y que nos postreros dos díes rexistró valores de 34 microgramos per metru cúbicu nes estaciones del Palaciu de los Deportes y de Llugones, amenorgóse ayeri a 19 y 22 microgramos per metru cúbicu, respectivamente.

Na estación de Sama los valores pasaron de 30 a 18 microgramos per metru cúbicu.

La llende d'activación del protocolu en nivel preventivu ye de 25 microgramos per metru cúbicu como media diaria.

La concentración de partícules PM10 (menores de diez micres) tamién menguó en toles estaciones de la zona central.

Nun comunicáu, el Gobiernu del Asturies estimó "la collaboración a tolos organismos públicos y privaos, empreses y ciudadanos, que participaron nes actuaciones y siguieron los encamientos d'estos postreros seis díes “sobre manera a los conceyos d'Uviéu, Siero y Llangréu, afectaos pola contaminación.