Dimite'l presidente de Duro Felguera

Acacio Rodríguez va ponese al mandu de la compañía

El presidente de Duro Felguera, Ángel del Valle, dimitió del so cargu dempués de selmanes de negociaciones y presión de la banca.

Duro Felguera atropa una delda que xube a 267 millones d'euros y la moratoria de la banca pa la refinanciación acaba'l 14 de xineru.

Al mandu de Duro Felguera pondráse l'hasta agora conseyeru Acacio Rodríguez. Ángel Antonio del Valle pasaría a ocupar un puestu como conseyeru non executivu en representación de la Familia Arrojo, los accionistes mayoritarios de Duro Felguera.

El presidente del Principáu, Javier Fernández, señaló que lo fundamental ye garantizar el futuru de la compañía.

La marcha de Del Valle, una constante nos conseyos

Ángel del Valle siempres sostuvo que nun quería ser una torga pal futuru de la so compañía. Sicasí nos últimos meses yera'l principal tema d'alderique en difíciles Conseyos d'Alministración.

La banca per un llau consideraba que la so marcha yera necesaria pa recuperar l'enfotu nel futuru de Duro y la entrada d'inversores. Los trabayadores, per otru, considérenlu'l causante de la mala situación qu'atraviesa la compañía.

Sicasí, del Valle siguía al mandu de Duro sofitáu polos socios mayoritarios que son miembros de la so familia, enfrentaos a otra parte del Conseyu que pidía, una y otra vez, la so salida.

Duro atropa una delda bruta de más de 300 millones d'euros cola banca y perdes de 11 millones d'euros al zarru del tercer trimestre.

A esta situación amiéstase la falta de carga de trabayu por mor en parte a la querella que la Fiscalía Anticorrupción presentó escontra del Valle por presuntos sobornos a funcionarios de Venezuela pa consiguir contratos. Situación que torgaría, hasta agora, a la compañía, nuevos contratos en Sudámerica.

Mientres el Conseyu yá aprobó midíes como la venta de Duro Felguera Rail y de la sede de la compañía en Madrid, amás de l'ampliación de capital con entrada de nuevos socios inversores, la capitalización parcial de la delda bancaria y la refinanciación del restu de la delda.