Dispositivu especial p'asegurar el derechu al votu en Somiedu

La nieve podría dexar aisllaos a dellos vecinos, si se cumplen les previsiones

La nieve nun va ser una escusa en Somiedu pa nun dir votar mañana. El Conceyu dispunxo un dispositivu de trabayadores municipales, cuñes y quitanieves pa que, en casu, de que les previsiones de mal tiempu se cumplan, naide quede ensin poder dir a una de les tres meses electorales del conceyu.

Los trabayadores municipales van tar de guardia, con cuatro máquines quitanieves preparaes.

Benjamín Cobrana ocúpase de la máquina que cubre la zona d'El Val.le del L.lagu, asitiáu a más de 1.200 metros d'altitú. Los vecinos d'esta zona tienen asignada la mesa electoral asitiada nel colexu de La Pola (Somiedu) y hai otres dos nel conceyu, en La Riera y Corés.

La nieve güei yá nun ye tan abondosa como ayeri, pero la zona de Somiedu va tar mañana de nuevo n'avisu mariellu por riesgu de nevaes, asitiando la cota sobre los 1.000 metros y con acumuladures que podríen ser d'hasta 15 centímetros a partir de los 1.200.

Por si acasu, el dispositivu ta preparáu. Too a puntu pa que los vecinos de les 15 parroquies y 68 nuedos del conceyu puean votar ensin problema, nes meses electorales que-yos correspuenden.