Dos fuexes de la Guerra Civil van ser desenterraes esti mes en Gozón y Pravia

Créese que tienen los resclavos de cinco persones represaliaes ente 1937 y 1938

L'Asociación pa la Recuperación de la Memoria Histórica va desenterrar dos fuexes comunes n'Asturies los díes 20 y 21 de mayu. Tán asitiaes en Gozón y Pravia y en total creen qu'alluguen los resclavos de cinco persones represaliaes ente 1937 y 1938.

Na exhumación va participar la Sociedá d'Estudios Aranzadi aniciada nel País Vascu y encabezada pol antropólogu Francisco Etxeberría.

Nel campusantu de Bañugues, en Gozón, nun falten nunca flores a pesar de que nun hai certidume dafechu sobre la identidá nin el númberu de persones soterraes. Ye la fuexa conocida como 'Les candases', una cruz de piedra ensin inscripciones nel suelu del campusantu.

La cruz retiraráse'l próximu 20 de mayu pa poder desenterrar la fuexa. Podrá confirmase asina que debaxo tán soterraes tres y non cuatro muyeres como se pensaba hasta agora. D'oficiu conserveres, de Candás, desapaecieron en mayu de 1938. Pocos díes dempués la mar devolvió los cuerpos. Tiráronles dende Peñes, seis muyeres y cinco homes que fueron soterraos en dellos llugares. Dos calabres nunca se recuperaron.

Les families de siete d'esos desapaecíos pidieron l'apertura de la fuexa. Hasta 15 persones collaboraron na investigación fecha pola ARMH en cinco meses.

La exhumación va ser simultánea a la d'otra fuexa asitiada en Pravia. Equí tán soterraos dos hermanos represaliaos na Nuechebona de 1937.

La exhumación ta dirixida pol antropólogu forense Francisco Etxeberría, que se va mover dende'l País Vascu xunto con una decena de voluntarios. Un total de 40 persones van participar nos trabayos.

Les de Gozón y Pravia son les primeres fuexes que se desentierren n'Asturies en cuasi una década. Cuasi 80 años dempués les pruebes d'ADN van dexar poner nomes y apellíos a les persones que xacen equí.