Dos selmanes del corte al tráficu de la vía que xune Casazorrina con La Espina

Los vecinos de los pueblos más afectaos traten de faer una vida lo más normal posible

Cúmplense dos selmanes del corte al tráficu de la vía que xune Casazorrina con La Espina. Un día más les máquines siguen quitando tonelaes de material de la estructura, onde yá quitaron elementos como'l tableru o les vigues.

Per delantre queden munchos meses de munchu trabayu enantes de ver reconstruyida la ponte, lo que llevó a Delegación de Gobiernu a nun afitar una fecha concreta pa la so finalización.

Lo que sí ta más próximo, si los plazos se cumplen, ye l'apertura del pasu nesta carretera rexonal AS-370, afitada pa dientro de dos selmanes, que va poner fin a los trestornos económicos y de tiempu pa los vecinos d'esta zona.

La carpintería d'Antonio Bravo ye unu de los pocos negocios de Godán. Con bona parte de los sos veceros na capital del conceyu, el corte de la vía que xune Casazorrina con La Espina ta xenerando un bon númberu d'inconvenientes.

L'alternativa son carreteres locales qu'allarguen el trayectu en más de 15 minutos. Daqué que nun ye solución pa la ganadería d'Óscar Fernández. Lleva ensin poder mover a les sos vaques a los sos praos del otru llau de la ponte dende'l mesmu día que se cortó.

Otres soluciones usaes son caminos de tierra próximos a la obra o un rodéu de media hora per Soutu los Infantes. Por eso toos quieren creer que la fecha marcada pa la reapertura, a principios de setiembre, se faiga realidá.