Ebhisa multada con 60.000 euros pola autocombustión de piles de carbón n'El Musel

La compañía nun adoptó les midíes afayadices pa evitar l'autocombustión del mineral nes instalaciones portuaries

La Conseyería de Transición Ecolóxica sancionó con 60.000 euros a European Bulk Handling Installation (Ebhisa), la empresa que xestiona la terminal de granel del cai d'El Musel, por una infracción grave rellacionada cola autocombustión de piles de carbón a finales de xineru y principios de febreru, en feches nes que taba activáu'l protocolu escontra la contaminación.

La sanción impúnxose al afitar que la compañía nun adoptó entós les midíes afayadices pa evitar l'autocombustión del mineral nes instalaciones portuaries nin p'apagar los puntos calientes de les piles de carbón cuando se comprobó la ignición, informa la conseyería.

La Dirección Xeneral de Calidá Ambiental, por aciu de cinco inspecciones a Ebhisa, constató que la empresa nun siguió “les midíes obligaes y previstes” na instrucción pa faer frente a esti tipu de sucesos, polo que considera qu'esti incumplimientu supón una infracción grave, acordies cola Llei de Calidá del Aire y Protección de l'Atmósfera.