Educación cifra nun 5,17% el siguimientu de la fuelga d'interinos

Reclamen que s'aplacen les oposiciones previstes pal mes de xunu

La Conseyería d’Educación cifró nun 5,17% el siguimientu de la fuelga convocada ente’l profesoráu interín polos sindicatos Suatea y Sintta pa reclamar que s’aplacen les oposiciones previstes pal mes de xunu n’Enseñanza Secundaria, FP y Escueles Oficiales d’Idiomes y que se negocie un nuevu alcuerdu que dea mayor estabilidá a esti colectivu.

A la fuelga taben llamaos un total de 5.053 docentes, de los que 262 formaben parte de los servicios mínimos afitaos, y la xornada de paru foi sofitada por 248 interinos, según la información apurrida polos centros a Educación.

Estos dos sindicatos piden que s’aplacen les oposiciones "pola situación d’inseguridá sanitaria" xenerada pola pandemia y porque consideren que’l "escesu de carga de trabayu" de los profesores pola semipresencialidá y l’adaptación del llabor docente supón "una situación de desigualdá manifiesta".