El 90% de los talleres d'Asturies tán zarraos

La mayoría acoyéronse a ERTEs pol amenorgamientu nel usu de los vehículos

El 90% de los talleres mecánicos n'Asturies tán zarraos, según l'Asociación del Automóvil del Principáu. A pesar de ser consideraos serviciu esencial, l'amenorgamientu nel usu de vehículos provocó que la mayoría tengan qu'acoyese a ERTEs. El sector del automóvil emplega na nuesa rexón a 4.000 trabayadores.

Los vehículos malapenes puen circular y los talleres trabayen solo en casu d'emerxencia. La patronal del automóvil considera que'l sector ta gravemente afectáu poles esixencies impuestes tres l'estáu d'alarma.

Los talleres asturianos acoyéronse a ERTEs y ye que, los que caltienen servicios esenciales, tampoco necesiten a tola plantiya.

El 85% de los vehículos tán paraos, polo que los espertos encamienten siguir una serie de conseyos pa evitar averíes tres estes selmanes ensin movimientu.

El caltenimientu de los vehículos modernos necesita tecnoloxíes de les que nun tenemos en casa. Pa los coches de más de 10 años, convién comprobar l'estáu de los frenos y les bateríes enantes de ponelos de nuevo en marcha.